CAGAYAN DE ORO CITY – Nag-inangkunay sa nakuhang pasidungog gikan sa DILG-Manila ang kanhi mag-alyado sa politika nga sila incumbent City Mayor Rolando ‘Klarex’ Uy ug kanhi City Mayor Oscar Moreno nunot sa pagsilbing SEAL OF GOOD LOCAL GOVERNANCE o SGLG awardee sa syudad ning tuiga.
Kini human ilha sa maong ahensiya ang mga programa sa city govt diin si Uy ug mga kauban sa city hall ang personal nga midawat sa pasidungog didto sa kauluhan sa miaging semana.
Namugos si Klarex nga gi-basehan sa nat’l evaluation team ang mga datos sulod sa usa ka tuig niya nga paglingkod isip mayor sa dakbayan.
Una nang gipasigarbo sa administrasyon ang SGLG kay pinakauna kining nakab-ot nga pasidungog sa tibuok kasaysayan sa dakbayan.
Namahayag si Uy nga dili na unta mangangkon ang kanhi administrasyon kay wala nila kini mahimo sulod sa siyam ka tuig nga pagyaka sa cityy hall.
Samtang dili na lang daw hikawan aron matughan si ‘Klarex’ kon unsa ang bation sa makadawat sa talagsaong pasidungog sama sa SGLG kuyog ang 2.3 milyones pesos nga salaping cash gikan sa DILG-Manila.
Kini ang reaksyon ni Moreno nunot sa pagsulti ni Uy nga igo lang kini nangangkon kon unsa man ang kalampusan sa dakbayan nga wala niya makab-ot sa iyang siyam ka tuig sa katungdanan.
Miingon si Moreno nga nakuha kini nga pasidungog dili tungod kay si Klarex ang nagdumala apan sa sistema sa pang-gobierno nga ilang napatuman sa miaging siyam ka tuig sa dakbayan.
