Giisip karon sa City Information Office nga mas makatabang kon ang mga hingtungdan nga resource persons na mismo ang mopasabot sa tinuod nga kahimtang sa kontrobersyal nga Mega Health Center.
Kini human giangkon ni City Information Officer Jade Adeser nga medyo sensitibo ang status sa maong proyekto ug gilikayan nila nga magkalahi-lahi ang mogawas nga rason sa publiko.
Gitinguha sa CIO nga sa sunod nga committee meeting, anaa na ang City Treasurer, Accountant, ug Engineer aron direktang matubag ang mga teknikal nga pangutana.
Giklaro ni Adeser nga isip secretariat, ang ilang papel mao lamang ang pagpasa sa impormasyon ngadto sa prensa ug sa katawhan, apan ang mga hingtungdan nga opisyal ang angay mohatag sa tinuod nga detalye. Tumong niini nga masiguro nga facts o kamatuoran lamang ang makuha sa publiko ug malikayan ang bisan unsang pagduda o sayop nga pagtoo sa maong proyekto sa dakbayan. (jane mae abulag)
