CAGAYAN DE ORO CITY – Gikalipay sa kompanyang MetroPac Waters ug Cagayan de Oro Bulk Water Incorporated nga gikatagbo nila ang interim officials sa Cagayan de Oro Water District o COWD nga mga tinudlo sa Local Water Utilities Administration o LWUA didto sa kauluhan.
Kini human ang sobra napulo ka adlaw nga pag-takeover sa interim officials sa COWD subay sa mando ni President Ferdinand Marcos Jr gumikan sa isyu sa gilantugian nga utang nga gisingil sa COBI.
Namahayag sa Bombo Radyo si MetroPac Senior Legal Counsel Roberto Rodrigo nga nakauyon sila sa gipakitang taras sa I-COWD officials kay gituki nila ang hisgutanan sa obligasyong-pinansyal nga nalatid sa kontrata sa panubig sa syudad.
Siya miingon nga masaligon sila nga tungod sa pag-ila sa I-COWD officials sa legalidad sa kontrata, mahataga’g sulbad ang maong suliran nga nahimong political issue dinhi sa syudad.
Una nang nanganti usab ang regular COWD board of directors nga idangop nila sa hukmanan ang pagsulod sa LWUA officials aron masuta kon legal ba ang ilang gipanghimo ning panahona.
Giklaro ni regular COWD BoD Dr. Gerry Caño nga andam sila mo-respeto kon isulti sa korte ug sa Office of the Government Corporate Counsel nga sulod sa balaod ang gihimo sa LWUA.
Apan kon mopabor usab ang ruling sa korte ug OGCC sa petition sa panig nila ni Caño,laras nga mabaliwala ang gipanghimo sa LWUA nga sinugo ni Marcos.
Dumduman usab nga naglugwa ang impormasyon nga walay nakit-an ang Commission on Audit o COA nga bisan unsa nga utang ang COWD ngadto sa MetroPac-COBI.
