TEMPORARYONG GIPAPABILIN sa evacuation sites ang mga residente sa landslide-prone area sa Barangay Agusan ning syudad, human kalit nga miugmad ang yuta sa unang higayon nga nahitabo ang landslide sa maong barangay.
Sumala ni Barangay Captain Andrew Melizza, kasamtangang nakigkoordinar ang barangay sa City Disaster Risk Reduction and Management Department (CDRRMD) ug sa Mines and Geosciences Bureau (MGB) aron masuta kung luwas na bang balikan ang maong area, human sa landslide nga nahitabo sa miaging semana atol sa paglabay sa Bagyong Basyang.
Dugang pa ni Melizza, lakip usab sa ilang gitan-aw ang mga lakang aron dili na mausab ang maong insidente, nga miresulta sa makasubong kamatayon sa upat ka tawo ug pagkaangol sa duha ka bata.(James Oliver)
