CAGAYAN DE ORO CITY – Mag-atubang sa kasupakan sa Customs Modernization and Tariff Act o CMTA ang mga tawo nga utok sa pagpalusot sa imported smuggled vehicles gikan Japan nga gipasulod dinhi sa Misamis Oriental.
Kini kon mapakyas ang consignee sa pagpresentar sa mga dokumento nga legal ang kargamento nga unang midunggo sa sub-port sa Mindanao Container Terminal sa lungsod sa Tagoloan ning lalawigan sa milabay’ng Pebrero 2024.
Namahayag si Customs Cagayan de Oro District Collector Alexandra Lumontad nga unang gipatoo nga 55 ka packages sa used auto spare parts ang karga sa midunggo nga container van sa pantalan.
Apan sa pisikal na nga pagsusi,nasuta nga karga niini ang used 1985 Suzuki Jimny;used 2011 Mercedez-Benz G Class;used 2003 Toyota LC Prado ug used 1995 Toyota LC Prado.
Balor sa halos 7 milyones pesos ang maong mga nabawi nga sakyanan nga apil ang mga buhis ug ubang obligasyon niini sa gobierno.
