Nanawagan si House Committee on Justice Chair Representative Gerville Luistro alang sa mas lawom nga imbestigasyon sa giingong “Michael Yang–Sammy Uy network” human motugma ang pipila ka transaksyon sa mga rekord sa Anti-Money Laundering Council (AMLC).
Matod ni Luistro, dili na kini simpleng alegasyon tungod kay adunay opisyal nga basihanan nga nagkinahanglan sa pagsusi sa lapad nga network, agi-anan sa kwarta, ug posibleng mga nalambigit.
Ang panawagan gihimo ni Luistro human motugma ang mga rekord sa testimonya ni kanhi Senador Antonio Trillanes IV sa hearing sa komite niadtong Abril 22.
Sumala pa ni Luistro nga ang mga pahayag nga naglakip sa giingong milyon-milyong pay-out ug mga ngalan sama nila Michael Yang ug Sammy Uy nagkinahanglan sa mas lawom nga pagpanukiduki tungod kay dagkong mga personalidad ang nalambigit.
