CAGAYAN DE ORO CITY – Namiligro nga maapektuhan ang mga programa ug mga proyekto ubos sa pagdumala sa Mindanao Devt Authority o MinDA.
Kini human nasuta ni MinDA Secretary Maria Belen Acosta nga dunay plano ang National Economic Development Authority o NEDA nga wad-on ang ilang buhatan subay sa balaodnon nga giduso sa kamarabaha.
Mihangyo si Acosta kang House committee on Mindanao Devt Authority chairman Misamis Oriental 2nd District Cong. Bambi Emano nga angayang mapugngan kini aron dili mosamot paglisod ang katawhan sa Mindanao nga dugay nang napihig sa mga mihuras gikan sa kauluhan.
Gilayong gipasalig usab sa kongresista nga iya kining susihon sa komitiba nga naghawid sa balaodnon nga nagtinguha mahimong departamento ang NEDA.
Hisayrang kini ang unang higayon nga mihimo’g panagtagbo ang komitiba kuyog sa MinDA officials sa kamarabaha kagahapong adlawa.
