CAGAYAN DE ORO CITY – Gi-imbestigaran sa buhatan sa administrador sa kapitolyo-probinsyal si retired Police Col. Robert Roy Bahian nga nagsilbing warden sa Misamis Oriental Provincial Jail.
Kini ang hinungdan nga gipahamtangan siya ni Provincial Gov. Peter Unabia sa pila ka bulan nga preventive suspension aron paspas ang paglusad sa imbestigasyon.
Namahayag si MOPJ Asst Jail Warden Francis Sarangay nga subay sa sulti ni Unabia nga tipik sa basehan sa suspension batok Bahian ang pakyas pagka-rekober sa naka-eskapo nga piniriso sa miaging tuig.
Subay usab sa pipila ka impormasyon nga nadawat sa Bombo Radyo,ubay-ubay’ng reklamo ang gipalanog sa mga piniriso batok sa pagdumala ni Bahian sa maong bilangguan.
Isip pagsunod sa protocol, bukas ug malinawon nga gidawat ni Bahian ang kamanduan diin nagpasalig sa kanunay’ng andam nga pagtubag sa imbestigasyon.
Si Bahian sa wala pa nahimong MOPJ warden, kanhi usab kini nga city director sa Cagayan de Oro City Police Office ug provincial commander sa Misamis Oriental Police Provincial Office.
Sa kasamtangan,si Sarangay una ang natahasan sa pagpatuman sa mga programa alang sa overcrowded nila nga jail facility nga pabiling nakabase dinhi sa syudad.
