CAGAYAN DE ORO CITY – Miinit pa ang kampanya sa duha ka kandidato pagka-brgy kapitan sa Lapasan ning syudad.
Kini human nanganti si 2023 Ms Cagayan de Oro 1st runner up Kathryn Guipetacio nga kasuhan si incumbent Lapasan SK chairwoman Carol Jane Bilar kay giingong nag-akusar kaniya nga ka-relasyon ni re-electionist Punong Brgy Julieto Ogsimer.
Namahayag si Guipetacio nga kon dili mangayo’g pasaylo atubangan sa publiko si Bilar,mapugos kini pagduso’g kasong kriminal sa piskalya tungod sa nahatag niini nga pagpaka-ulaw.
Gawas nga 1st runner up sa Ms CdeO 2023 si Kathryn,nagsilbi usab kining Ms. Lapasan ning tuiga.
Samtang andam mosibog sa iyang kandidatura ang 2017 Ms.Lapasan nga si Bilar sa nagkaduol nga brgy election sa syudad.
Kini kon dunay makabarog ug makamatood nga siya nagsulti nga giingong may tam-is nga relasyon si Ogsimer ug Guipetacio.
Namugos si Bilar nga wala siya’y gihambin nga kasuko kang Kathryn rason nga imposible ang gipamugos sa kampo ni Ogsimer.
Apan nanganti usab kini nga dili hagiton aron kalikayan nga ilugwa ang iyang giingong mga ebedensiya tali ni Ogsimer ug Guipetacio.
Si Bilar kinsa midagan pagka-brgy konsehal ang ubos sa linya ni Rudy ‘Janggo’ Mediana nga nakigbangga sa bando ni Ogsimer.
