CAGAYAN DE ORO CITY- Gikasuhan sa syndicated estafa ang pamilyang Pagaspas sa National Bureau of Investigation o NBI-10 human malambigit sa online scam dinhi sa syudad.
Giila ni NBI-10 agents head Atty. Alex Caburnay ang mga suspek nga sila si Pablito Pagaspas;kapikas nga si Rosalie Pagaspas ug anak nga si Domie Pagaspas nga nagpuyo ning syudad.
Si Caburnay miingon nga lauman pa nga daghang suspected online scammers ang makasuhan tungod kay daghan pa reklamo ang iyang nadawatan.
Gipahimangnuan usab ni Caburnay ang publiko nga magbinantayon kay pabilin gihapon nga nagkatag sa social media ang online scams.
Sila si Pagaspas ang kabahin sa daghang gitumbok nga handlers sa investors nga midawat sa ilang pamuhunan nga pakyas nang mabalik dihang nabulabog ang walay permit sa gobierno nga online investments sa syudad sukad tuig 2018.
Nasayran nga nabilanggo na ang upat sa mga investor tungod sa kapakyasan makabayad sa investments gikan sa ilang mga kapitalista.
