CAGAYAN DE ORO CITY – Misaka sa napulo ka bata ang natakbuyan sa sakit nga pertussis sa Northern Mindanao ning tuiga.Kini subay sa impormasyon nga gilugwa sa Dept of Health 10’s Regional Epidemiology Surveillance and Disaster Response Unit o RESDRU nga nakatutok sa maong sakit.
Namahayag si RESDRU cluster officer-in-charge registered nurse Jasper Kent Ola nga sa maong ihap,tulo na ang kompirmadong positibo diin duha niini gikan mismo dinhi sa dakbayan.
Siya miingon nga gawas sa syudad nga dunay tulo ka kaso,nasudlan usab tag-usa ka biktima ang Iligan City,Ozamiz City,Lanao del Norte,Opol,Misamis Oriental,Lantapan,Bukidnon ug Camiguin.
Samtang dili matawag nga pertussis outbreak ang pagkupot sa Northern Mindanao sa napulo na ka bata nga biktima sa maong sakit ning tuiga.
Namahayag si Ola nga moagi sa subsob nga proseso sa Dept of Health 10 ayha ipaubos sa maong kategorya ang usa ka lugar.
Siya miingon nga sukad mibuto’g balik ang pertussis sa nasud,pabiling negatibo pa sa outbreak status ang bisan asa nga bahin sa Amihang Mindanao.
Dugtong niini,dili gusto ni Uy nga mabutang sa outbreak sa sakit nga pertussis ang syudad susama sa gidangatan sa pipila ka Manila-based urbanized cities ug bisan sa probinsya-syudad sa Iloilo.
Kini ang nag-unang rason nga giawhag sa mayor ang mga inahan nga pabakunahan ang ilang mga anak nga nag-edad usa ka tuig paubos.
Namahayag si Mayor Klarex nga pinaagi sa subli pagsul-ob sa face masks sa katawhan,maubsan ang tsansa sa paspas nga pagtinakdanay sa pertussis sa pampublikong lugar ug mismo sulod sa mga pinuy-anan.
