CAGAYAN DE ORO CITY – Makasugakod ang Mindanao nga mag-lain ug dili na magpa-kontrol sa nasudnong kagamhanan kon dunay subayon nga mekanismo.
Kini ang nakita nga sanglitanan ni Oro Chamber of Commerce chairman of the board Ray Talimio Jr sa nunot sa gipalutaw ni kanhi Pres Rodrigo Duterte nga posibilidad nunot sa dismayado nga pagdumala ni Pres Bongbong Marcos.
Miingon si Talimio nga tipik sa lakang nga ikalahutay sa Mindanao mao ang pag-agak sa ubang huyang nga rehiyon sa SOCKSARGEN nga angay abayan sa Davao region ingon man ang Caraga ug Zamboanga Peninsula nga iabay usab sa Northern Mindanao.
Samtang dili kumbinsido ang Iglesia Filipina Independiente o IFI sa gihimong basehan sa mga kongresista aron usbon ang unod sa batakang balaod sa nasud.
Miingon si IFI Bishop Felixberto Calang nga sobra kahuyang ang gipamugos sa kamara nga tandugon ang economic provisions aron matubag ang kapobrehon sa katawhan.
Kini tungod kay dugay ra nga naglihok ang foreign direct investments sa Pilipinas apan huyang lamang gihapon ang ekonomiya ug miguba pa sa kinaiyahan ang mga dala nga negosyo niini.
Dumduman nga una nang namahayag ang simbahang Katoliko pinaagi sa CBCP nga dako sila nga supak sa charter change pinaagi sa People’s Initiative.
