Gipasigarbo ni Michael Jordan MJ Abragan, ang coach sa Northern Mindanao Arnis team, nga nakahakot na og lima ka gold medals, lima ka silver medals, ug unom ka bronze medals ang iyang mga atleta sa kasamtangan nga kompetisyon.
Gipahayag sa maong coach nga ang maong mga medalya naggikan sa paningkamot sa mga batan-ong magduduwa gikan sa Misamis Oriental, Malaybalay, ug Cagayan de Oro.
Dugang pa niya, padayon pa ang ilang paglaban sa kategorya nga combative sa secondary level busa duna pa silay igong kahigayonan nga madugangan ang ilang bulawan nga mga medalya.
Matud pa ni Abragan, duna pa silay pito ka dulaan nga nahabilin karong adlawa diin posibleng makadugang og laing pito ka gold medals ang ilang grupo.
Gikatakda nga human sa eliminasyon ug quarterfinals karon, sugdan na ang mga championship match ug ang awarding ceremony ugma sa hapon alang sa mga mananaog.
