CAGAYAN DE ORO CITY – Agresibo ang tanan sakop sa 4th Infatry Division Phil Army nga mapalayas ang tibook teroristang pundok nga nagtagu-tago sa mga hilit nga bahin sa Amihanang Mindanao, Lanao Area ug sa Bukidnon. Gibutyag ni Capt Joe Patrick Martinez, tigpamaba sa 4ID nga andam ang militar nga makigduelo sa mga gi-armasang grupo sa NPA subay sa kamanduan ni Pres Rodrigo Duterte nga “all out war” batok sa teroristang grupo. Si Martinez miingon nga napungot na ang mga residente ug mga lumad nga kaniadto, hapsay nga nagpuyo sa ilang yutang kabilin, sa walay puwas nga pag-atake sa mga NPA. Taliwala sa kawad-on sa mga residente, nakahimo pa’g “extortion ug propaganda activities” ang teroristang pundok sa maong mga dapit.
Hugot nga gihimakak ni Capt Martinez ang report nga wala maka-bantay ang mga sundalo sa gilusad nga atake sa mga teroristang NPA sa mga hinterland barangays sa lalawigan Misamis Oriental, sa milabay’ng adlaw. Inay i-angin ang mga sibilyan, gipa-on matud pa sa mga sundalo ang ilang lawas aron dili mulusot ang mga bala sa sa labing duol nga komonidad nga lakip sa gitarget sa guerilla force sa NPA. Nagtuo si Martinez nga wala nay nahibilin pa’ng kalooy para sa mga sibilyan ang mga nagkupot sa armas gikan sa sakop sa NPA. Subay sa intel report sa militar, aktibo ang NPA sa pagrecruit sa mga batan-on aron himoong child warriors.
Gihagit sa kasundaluan ang mga sakop ni Jorge Madlos, ang gika-intapang wanted sa daghang kasong pagpatay, nga barugan ang ilang gipanumpaang ideyolohiya. Gisaway sa tigpamaba sa 4th ID ang daw bandido nga pamaagi sa NPA sa pagkab-ot sa hustisya. Sayud na ang mga sakop sa militar nga nawala na ang pagsalig ni Pres Rodrigo Duterte sa ilang matud pa sensiridad sa pagduso sa bilateral ceasefire. Si Capt Martinez miingon, nawala na sa prinsipyo sa mga sakop ni Madlos ang kalooy sa mga maipit nga mga sibilyan sa crossfire ug nakatutuk na sila sama sa hinimoang kidnapping, arson, ug recruitment sa mga teroristang ISIS ug bandidong abu sayyaf.
