CAGAYAN DE ORO CITY – Mag-atubang sa kasong pagsupak sa anti-graft and corrupt practices act ang grupo ni City Mayor Rolando ‘Klarex’ Uy kon ilang hilabtan ug wad-ag bili ang joint venture tali Cagayan de Oro Water District o COWD ug Cagayan de Oro Bulk Water Incorporated o COBI.
Kini ang punto-legal ug pagpadumdom ni kanhi City Mayor Oscar ‘Oca’ Moreno sa kampo ni Uy nga miporma’g task force aron imbestigaran ang COWD-COBI contract sa tuyo nga lahi na mag-water supply sa dakbayan.
Miingon si Moreno nga lig-on ug protektado sa balaod ang gahom sa kontrata ug bisan ang kongreso dili makapanghilabot niini sukwahi sa gitoohan sa city hall nga gigamit ang konseho sa dakbayan.
Dumduman nga gisugdan na’g imbestigar sa city government kon nganong dili angay mawad-a’g bili ang kontrata epekto sa pagbahad niini nga putla’g tubig ang katawhan kon dili kabayad sa sobra 400 milyones pesos nga bayronon.
Tuyo usab sa gihimong imbestigasyon nga ma-establisar ang giingong dakong bisbintaha sa gisudlang kontrata sa COWD ngadto sa COBI aron ilisdan sa bag-ong kompanya nga mosuplay sa panubig sa dakbayan.
Hisayrang gipamugos ni Mayor Klarex nga pagluwas sa katawhan sa panginahanglan sa panubig rason nga gipaimbestigar niya ang kontrata.
