CAGAYAN DE ORO CITY – Magsilbing numero uno nga tigpaminaw ni City Mayor Rolando ‘Klarex’ Uy samtang batbaton niya ang 2nd State of the City Address o SOCA ang iyang kanhi alyadong-politikal apan karon kritiko na nga si kanhi City Mayor Oscar Moreno.
Matud ni Moreno nga intresado kining maminaw sa unod sa SOCA ni Klarex aron masukod niini kon unsay iyang mga nahimo sukad naglingkod sa city hall.
Namahayag ang kanhi mayor nga may mga isyu kini nga gustong madunggan ug kon giunsa pagtubag ang naglimin nga mga suliran niini.
Partikular nga gitumbok ni Moreno ang isyu sa panglawas ug ubang mga programa nga iyang gihingusgan sa siyam ka tuig apan gisalikway na lang pagpuli sa Klarex administration.
Nakasaway usab si Moreno kon nganong dili sa Plaza Divisoria nga saksi sa kasaysayan sa pagkahimong syudad sa Cagayan de Oro.
Giklaro niini nga dili dautan nga gamiton ang Aquilino ‘Nene’ Pimentel International Convention Center sa Sitio Taguanao,Barangay Indahag apan mas sayon dalikyatan sa katawhan ang Divisoria.
Hisayrang sa city mayor’s address ni Moreno sa siyam ka tuig,pulos gihimo kini sa Divisoria ning syudad.
