CAGAYAN DE ORO CITY- Nahatod na sa nagkadaiyang munisipyo sa Misamis Oriental ug ning syudad ang mga balota nga gamiton sa nagkaduol na gayud nga 2019 midterm elections.
Miingon si Misamis Oriental provincial elections supervisor Atty. Aleli Ramirez nga anaa sa dul-ag usa ka milyon ka balota nga gipahimutang sa treasurer offices sa nagkadaiyang lugar ug lakip na dinhi sa syudad.
Miingon si Ramirez nga silyado ang maong mga balota diin gitakdang buksan lamang sa adlaw sa piliay.
Samtang nakaabot na Voters Counting Machines o VCMs nga gamiton sa umaabot 2019 automated elections sa Mayo 13.
Gibutyag ni City Election Officer Atty Ramil Acol nga ipaggawas lamang sa logistic warehouse ang VCMs pag-abot na sa Mayo 10 diin himoon ang testing and sealing.
Sa pagkakaron, maoy pokus sa ahensiya ang paglusad sa refresher course sa mga magtutudlo nga magsilbing Electoral Boards o EBs.
Dugtong niini,andam na ang Cagayan de Oro City Police Office o COCPO sa paghatag seguridad sa Voters Counting Machines ug election paraphernalia nga moabot sa syudad alang sa nagkadool nga piliay.
Miingon si COCPO spokesperson Police Lt Col Mardi Hortillosa nga may security plan na sila nga giandam alang sa seguridad sa VCMs ug balota.
Dugang niini, ila na lamang gihulatan ang go signal sa Comelec sa himoong pagbantay sa mga election paraphernalia.
Una nang gibutyag ni City Election Officer Atty Ramil Acol nga maulahi ang pagpadala sa mga balota alang sa Cagayan de Oro.
