CAGAYAN DE ORO CITY – Dili na kapugngan ug pondo na lang ang kulang aron sugdan na’g guba ang 90 anyos nga labing karaan nga Govenor Paciencio Ysalina Bridge dinhi sa dakbayan.
Kini human kompirmaha ni DPWH 10 spokesperson Novie Cabrido nga nagsilbi nga proyekto sa natl govt ang pagbag-o sa maong tulay nga gigahinan sa 4 bilyone pesos.
Miingon si Cabrido nga subay sa pagtoon sa ilang construction engineers,sobra na ka delikado alang sa katawhan ang maong tulay.
Namahayag pa kini nga naghulat na lang sila sa pondo aron masugdan na ang pagtrabaho sa historical bridge.
Nasuta usab nga dunay balor 200 milyones pesos nga tukurong tulay aron magsilbing agianan sa mga tawo samtang magpadayon ang pagtrabaho sa sa tulay.
Samtang sa pikas bahin,gisugyot sa grupong Kagay-an Heritage Advocate nga dili dali-dalion apan angayang i-agi sa public consultation ang nakaung-ong nga plano sa pagbag-o sa 90 tulay.
Kini human nahinugon ang grupo sa historical value sa maong tulay nga buhing saksi sa sibilisasyon sa unang mga panghitabo sa syudad.
Miingon si Kagay-an Heritage Advocate member Arthur Aranas nga wala sila’y supak sa dugang katukuran sa mga tulay apan angay ma-preserbar ang mga kabtangan nga nagtangag sa dakong kasaysayan sa unang mga kaliwatan sa dakbayan.
