CAGAYAN DE ORO CITY – Dili gusto sa panig sa oposisyon nga mawaldas ang pangayo-on nga pondo sa Cagayan de Oro local goverment balor 8.8 bilyones pesos nga gamiton alang sa mga galastuhan sunod tuig.
Kini ang rason nga gitinguha nila nga masibog una ang pagpalabang alang niini sa Cagayan de Oro City Council kagahapong adlawa.
Kini maoy depensa ni Konsehala Imee Rose Moreno nga mitindog siya sa ilang regular session aron ipadayag sa iyang baruganan sa resolusyon sa mayoriya nga ipalabang na aron mahimuan sa balaod.
Miingon si Moreno nga tinood anaa lang sa 7 hangtod 8 porsiento ang gisaka sa gipangayong tinuig nga pondo ni City Mayor Rolando ‘Klarex’ Uy apan walay klaro kon madapat ba gyud kini sa nag-unang katuyuan.
Una nang miangal ang oposisyon kon nganong limitado lang sa tag-duha ka pangutana aron tukion ang naglangkob sa gipangayong pondo sa administrasyon.
Apan dunay igong gahom ug numero ang mayoriya nga gipanguluhan ni Majority Leader Edgar Cabanlas rason nga walay nahimo ang oposisyon sa ilang mga pagpangugat kabahin sa mga punto gusto unta nila mahatagan sa katin-awan.
