CAGAYAN DE ORO CITY – Nabahin ang pagbati ug baruganan sa mga sakop sa Partido Padayon Pilipino kabahin sa hukom ni 1st District Cong. Lordan Suan nga si kanhi City Mayor Oscar Moreno ang ilang gidala aron ibangga sa bando ni incumbent City Mayor Rolando ‘Klarex’ Uy sa piliay sunod tuig.
Kini human unang gisalig ni PADAYON PILIPINO Party chairman incumbent Misamis Oriental 2nd District Cong. Bambi Emano kang Suan ang kalihukan sa ilang bando sa dakbayan.
Miingon si Emano nga aduna sila’y mga miembro nga wala pa malimot sa gihimo sa kanhi Moreno administration nga pagkaso’g administratibo kang former City Councilor President Elipe diin siya konbiktado sa asunto.
Siya miingon nga kon modaug si Moreno batok Klarex sa May 12 elections,nagpakita kini nga napasaylo na sa mga miembro sa partido ang maong hitabo.
Una nang wala mobalos si Moreno pagkaso batok sa mga Emano dihang nahurot pagkabasura ang kasong kriminal nga gipasaka sa Sandiganbayan pinaagi sa Ombudsman sa miaging katuigan.
