Gisuspinde sa Department of Agriculture (DA) pinaagi sa Bureau of Plant Industry ang pag-eksport sa ube o purple yum aron mahatagan og prayoridad ang pagpauswag sa lokal nga produksyon niini.
Gipahayag ni Agriculture Secretary Francisco Tiu Laurel Jr. nga ang maong lakang nagtumong sa pagpanalipod sa nihit nga mga materyal sa pagtanom ug sa pagpugong sa mga langyawng kompetensya nga mogamit sa lokal nga klase sa ube sa Pilipinas.
Aron matubag ang kakulang sa suplay, ang gobyerno nagpatuman og mga inisyatibo sama sa tissue culture, community-based nurseries, ug mini-set propagation, kauban ang pagtagana og pondo gikan sa gisugyot nga badyet niini.
Dugang niini, ang mga nag-unang sakop sa sektor sa agrikultura ug akademya nagtukod sa United Ube PH Association Inc. aron mapadayon ug mapalig-on ang maong industriya. (raniel mahunyag)
