GIHANGYO sa 21st City Council kang City Mayor Rolando Klarex Uy nga magbutang sa mga abogado gikan sa City Legal Office aron motabang sa pagpaspas sa pag-aprubar sa mga dugay nang pending nga ordinansa.
Mitumaw ang maong lakang human mosugyot si Councilor Roger Abaday sa pag-umol og “legislative backstopping committee” nga pangunahan sa bise alkalde ug makig-coordinate sa City Legal Office sa pagreview sa mga proposed legislation sa mga konsehal.
Sa iyang special report, gipasiugda ni Abaday nga adunay susamang institutionalized legislative legal o technical support mechanisms sa mga siyudad sama sa Quezon, Davao, Iloilo ug Mandaluyong nga nakatabang sa pagpalusot sa mga importanteng balaod.
Samtang gipatin-aw ni Councilor Maximo “Jonjon” Rodriguez III nga nakafile na siya og proposed ordinance alang sa pag-umol og legislative division committee, si Vice Mayor Jocelyn “Bebot” Rodriguez mipahayag nga nangayo na siya og input gikan sa Civil Service Commission kabahin sa maong lakang.
Alang kang Majority Floor Leader Edgar Cabanlas, sama sa ginabuhat sa Kongreso nga adunay executive-legislative liaison officers, ang City Legal Office dili lamang para sa ehekutibo kondili makaalagad usab sa lehislatibong sangay sa kagamhanan. (James Oliver)
