GIPUNTIRYA sa Social Action Center Archdiocese of Cagayan de Oro ang dakong hulga sa checks and balances sa gobyerno kon ang gahum magpabilin nga hawid lamang sa pipila ka political families nga gihimong negosyo ang pamulitika.
Sumala ni Bong Florendo, coordinator sa grupo , dako kaayo ang risgo sa pag-abuso sa gahum kung walay balanse ug lig-on nga mekanismo sa pagtan-aw ug pagkontra sa desisyon sa mga naa sa poder.
Matod pa niya, ang pagdominar sa political dynasties makapahinay sa tinuod nga pag-uswag sa mga komunidad tungod kay nalimitahan ang representasyon ug kahigayunan sa ubang lider nga makaserbisyo sa katawhan.
Naghinaot si Florendo nga sa dili pa matapos ang termino ni President Ferdinand Marcos Jr., mamahimong usa ka lig-on nga legasiya ang pagpasa sa political dynasty bill.
Butyag niya nga kon matuman kini, dili lamang kini balaod kundili usa ka klarong baruganan batok sa konsentrasyon sa gahum ug alang sa mas patas nga demokrasya sa nasud. (James Oliver)
