Gidayeg ni Bise Presidente Sara Duterte ang pagpaningkamot sa pipila ka kanhi security personnel ni resigned Bicol Congressman Zaldy Co nga nagbutyag sa ilang kasinatian sa paghatod sa gi-ingong binilyong salapi gikan sa pondo sa gobyerno ngadto sa dagkong opisyal.
Segun sa sulat-pahayag sa bise presidente, nakita niya sa ilang testimonya ang kaisog ug integridad sa pagtug-an sa kamatuoran bisan pa sa risgo nga ilang giatubang.
Siya miingon nga human nahimong sentro sa akusasyon ang kongresista sa mga pagdungog, privilege speeches, ug walay hunong nga imbestigasyon, gikatingala niini ang kahilom sa pipila ka sektor sama sa simbahan, civil society groups, ug uban pang organisasyon nga kasagaran paspas sa paghatag sa reaksyon.
Giila ni Duterte ang nasampit nga grupo nga sagad mangusog sa isyu sa moralidad ug transparency, apan karon daw nagpakahilom ug wala’y klarong interes sa mga pamahayag sa mga kanhi security personnel.
Gikondinar usab ni Duterte ang kasamtangang administrasyon nga kuno nagapili lamang sa mga isyu nga hatagan sa pagtagad.
Busa nagpahimangno ang bise presidente nga unta ang isyu bahin sa korapsyon dili angay nga selektibo, dili angay nga pilion kung kinsa lang ang imbestigaran ug dili angay nga magpakahilom ang mga nalambigit nga duol sa administrasyon.
