Mipasidaan ang International Atomic Energy Agency (IAEA) sa mga atake sa nuclear facilities sa Russia ug Ukraine.
Miingon ang IAEA nga dili nila madawat ang maong opensiba ug kinahanglan undangon dayon aron malikayan ang tinuod nga risgo sa nuclear accident.
Gibutyag ni Director General Rafael Grossi nga ang drone strike sa miaging Sabado gitratar nga “serious incident” nga mihatag peligro sa prinsipyo sa luwas nga planta sa mga nukleyar.
Ang IAEA team nga nag-inspeksyon sa Zaporizhzhia Nuclear Power Plant nakakita’g kadaot sa metal access hatch sa gawas sa turbine building, uban sa debris ug nasunog nga optical fibers sa yuta. Base sa obserbasyon, ang mga kadaot nagresulta mga gilusad nga drone strike.
Ang follow-up inspection sa sulod sa turbine building naputol tungod sa drone activity ug pagpamusil, apan nakumpirma sa mga eksperto nga normal ang radiation levels ug walay immediate radiological threat.
