CAGAYAN DE ORO CITY – Wala mohimo’g loyalty check si House Speaker Martin Romualdez ngadto sa senior officials sa Eastern ug Westen Mindanao Commands sa Armed Forces of the Philippines atol sa pagbisita niini sa 4ID headquarters sa syudad ning semanaha lamang.
Kini ang pagpasabot ni 4ID spokepserson Maj Francisco Garello Jr kon nganong kalit nakabisita si Romualdez kuyog ang ubang mga kongresista sa usa ka kalihukan sulod sa Camp Evangelista ning syudad.
Miingon si Garello nga dunay naporma nga House of Representatives-AFP fellowship Mindanao Leg rason nga nakadalikyat si Romualdez sa miaging adlaw.
Apan miprangka ang 4ID nga gihangyo sila sa house speaker nga pabiling professional ug dili suportahan ang mga lakang nga makahatag kagubot sa nasud.
Samtang namugos usab ang liderato sa Police Regional Office 10 nga walay ilang na-monitor nga dunay destablization plot nga naporma sulod sa ilang hanay taliwala sa banging politika ni kanhi Pres Rodrigo Duterte ug Pres Bongbong Marcos.
Kini human unang giignan ni Duterte si Marcos nga illegal drug addict ug angay depensahan sa mga sundalo’g pulis ang konstitusyon sa nasud.
Nasamutan pa kini dihang namulong ang kanhi presidente nga mobulag na lang ang Mindanao sa Pilipinas tungod sa dili maayong tratamento sa nasudnong gobierno sa katawhan.
Miingon si PRO 10 spokesperson Maj Joann Navarro nga wala sa mga politiko ang ilang pagpabor apan sa kanunay ngadto sa katawhan ug sa konstitusyon.
