CAGAYAN DE ORO CITY – Gikakurat apan kabahin na sa politikanhong-sistema ang pagtambok ug pahatag suporta na ni Cagayan de Oro 2nd District Cong. Rufus Rodriguez kuyog sa uban niyang sakop sa pamilya ngadto sa liderato ni City Mayor Rolando ‘Klarex’ Uy sa 2025 elections sa syudad.
Kini human dal-a ni Rodriguez ang iyang puwersa sa Barangay Carmen samtang naghatag ayudang pinansyal sa daghang mga residente niini dungan sa kompirmasyon nga gidawat na nila ang unang gibutyag ni Mayor Klarex nga alyadong-politika na sila niini.
Kini ang reaksyon ni Cagayan de Oro 1st District Cong. Lordan Suan kinsa solido nga sakop sa partido Padayon Pilipino ug kakuyog si Rodriguez sa panag-alyansang politika nila ni kanhi Phividec administrator Jose Gabriel ‘Pompee’ La Viña sa 2022 elections batok sa One MisOr,One CdeO team ni Klarex.
Namahayag si Suan nga wala pa sila nagkahisgot ni Misamis Oriental 2nd District Cong. Bambi Emano kabahin sa gilauaman nga panag-uban sa mga Uy ug Rodriguezes.
Siya miingon nga pangandaman usab kini nila nga kalambuan sa politika sanglit walay kanunay nga alyado pag-abot sa kada-eleksyon.
Hisayrang sa alyansang Padayon Pilipino-Centrist Democratic Party ug Bag-ong Cagayan sa 2022 elections,pulos daug ang pagka-kongresista si Rufus ug Lordan sa ilang tagsa-tagsa ka distrito samtang lusot usab si City Vice Mayor Jocelyn ‘Bebot’ Rodriguez apan gipukan ni Klarex si Pompee sa pagka-mayor.
