CAGAYAN DE ORO CITY- Pursigido pagduso’g reklamo ang PDEA-10 batok sa consignee sa 320 ka drums sa hydrochloric acid nga unang nabawi sa Bureau of Customs o BoC gikan sa barko nga midunggo sa Mindanao International Container Terminal o MICT diha sa Tagoloan,Misamis Oriental sa miaging semana.
Kini tungod sa 3 ka kasupakan kon hisgutan ang anti-illegal drugs campaign nga mandato sa PDEA diin dili ordinaryo nga kemikal ang midunggo sa maong pantalan gikan sa India.
Gibutyag ni PDEA agent Ben Calibre nga dili pa kumpirmado nga isagol sa paghimo’g shabu ang maong mga kemikal kay gihulat pa nila ang resulta sa laboratory test niini.
Mihimo usab sila’g koordinasyon sa PDEA-Caraga aron sutaon kon tinood ba nga gamiton alang sa pagmina ang kemikal nga unang gipamugos sa consignee nga nakabase sa Butuan City atol sa pag-atubang sa kadagkuan sa BoC officials sa miaging adlaw.
