Gikuwestiyon sa People’s Budget Coalition ang halos pito ka libong proyekto nga nagkantidad og 190 bilyon pesos nga matud pa walay kalakip nga dokumentong mamahimong makita sa publiko.
Matud ni People’s Budget Coalition co-convenor Kenneth Ibasco Abante, dili nila tinguha nga ipaabot nga dunay kahiwian ang tanan sa maong mga proyekto, tungod kay giila usab nila nga nanginahanglan ang nasud og mga imprastraktura.
Bisan pa niana, gipasiugda ni Abante nga dapat dunay igo ug klarong dokumentasyon ang mga proyektong gipondohan gikan sa buhis sa katawhan.
Tungod niini, gipanawagan ni Abante ngadto sa Senado nga wagtangon na sa sugyot nga nasudnong badyet ang mga proyekto nga walay gilakip nga mga dokumento ug giaghat ang Presidenre nga dili kini aprubahan.
Gipadayag usab niya ang iyang pagkabalaka nga taliwala sa mga protesta ug panawagan alang sa reporma sa badyet, dili pa gihapon igo ang nahimong aksyon sa mga magbabalaod sa kamara baha.
Gipasalamatan usab niya ang mga senador sa pagpaminaw sa mga panawagan sa mga budget advocate alang sa sistematikong reporma sa proseso paghimo sa nasudnong badyet.
Dugtong niini, gilaumang magtigum ang Bicameral Conference Committee sa ikaduhang semana sa Disyembre karong tuiga, aron hisgutan sa duha ka kapulongan ang 2027 national budget nga nagkantidad og 7.2 trilyon pesos. (raniel mahunyag)
.jpg "Usec. Castro, gipamugos nga premature ang hisgutanan sa paghulip kang VP Sara")
