CAGAYAN DE ORO CITY – Gisaway ni former City Mayor Oscar Moreno ang pasado nga resolusyon sa konseho pinaagi sa special session diin nagtumong ipa-deklara nga PERSONA NON GRATA ang pag-negosyo’g tubig sa kompanyang METRO PACIFIC WATER ning syudad.
Kini human unang gipaubos ni City Mayor Rolando ‘Klarex’ Uy sa state of emergency ang kahimtang sa panubig nga gisuportahan usab sa konseho.
Namahayag si Moreno nga dakong illegal ang gihimo sa city govt ug angay sila mangandam kay puwede kining masumbong graft and corrupt practices act sa Ombudsman.
Miingon si Moreno nga tataw sa resolusyon nga isalikway sa gobiernong-lokal ang pag-negosyo sa MetroPac ug gitudluan ang Cagayan de Oro Water District ug Rio Verde Water Consortium nga ibalewala ang magkalahi nga kontrata sa panubig alang sa dakbayan.
Namugos ang kanhi mayor nga manubag pag-abot sa panahon ang mihimo niini kay wala tahura ang sanctity of contract nga tin-aw nalatid sa balaod.
Una nang namugos si City Council Majority Leader Atty. Edgar Cabanlas kon mapakyas pagkumbensir ang MetroPac sa city govt sa ilang basehan sa pagputol sa tubig,e-deklara kini nga persona non grata o dili na welcome mag-negosyo sa dakbayan.
