CAGAYAN DE ORO CITY – Gipatuman sa lower units sa mga kampong-militar ang hugot nga seguridad aron dili masubli nga masudlan sa langyaw’ng mga espiya sama sa giingong binuhatan sa China.
Sa interbyu sa Bombo Radyo,miingon si Philippine Army spokesperson Col Louie Dema-ala nga nagsumikad ang hugot nga lakang nunot sa pagkadakpi sa lima ka Chinese nationals nga nagsilbing espisya sa dugay nang panahon kauban ang duha ka Pinoy aron ipahuyang ang depensang-internal sa nasud.
Miingon si Dema-ala nga dugay nang gisunod sa intelligence community ang maong grupo hangtod nga nakakuha’g ensaktong tayming ug kini gipangdakop sa kauluhan sa miaging semana.
Gibutyag ni Dema-ala nga dili layo ang posibilidad nga adunay relasyon ang kaguliyang sa West Philippine Sea ug narekober nga submersible drones sa lima ka lugar sa nasud ug sa pagkadakpan sa maong Chinese spy sa miaging semana.
Dumduman nga una na usab gimando sa Philippine National Police nga mohimo sila’g security adjustments sa ilang mga kampo nunot sa pagkabulgar nga gipanid-an sa giingong mga taga- China ang internal nga mga kalihukan niini.
