Gisaway ni Philippines–China Understanding advocate Ben Tiu Contreras ang panawagan ni Senador Tito Sotto ug uban pang mga senador nga irekomenda sa Pangulo ang pagdeklara og persona non grata batok sa usa ka opisyal sa Chinese Embassy sa Manila.
Hisayran nga misugod ang isyu human mopagawas ang Chinese Embassy og mga pahayag nga giisip sa pipila ka Pilipinong opisyal nga bastos, walay respeto, ug daw nanghilabot sa internal nga kalihokan sa Pilipinas.
Bisan pa sa gipakitang patriotism ni Senador Sotto ug uban pang opisyal kalabot sa tensiyon sa West Philippine Sea, miingon si Contreras nga wala’y katungod ang usa ka senador nga magpahamtang og persona non grata tungod kay ang maong gahum anaa lamang sa Pangulo sa nasud.
Gihulagway usab ni Contreras ang gipakitang patriotism ni Sotto isip pakitang-gilas ug pamulitika lamang, nga matod pa niya gitumong aron mahumot sa mata sa katawhang Pilipino imbes nga makatabang sa pagpaubos sa tensiyon tali sa duha ka nasud. (James Oliver)
