Gitakdang ipatawag sa imbestigasyon sa senado ang pipila ka aktibo ug mga retirado nang mga pulis nga ubos sa Police Regional Office 10.
Kini human kabahin sa gi-presentar ni Sen Risa Hontiveros ang mga hulagway diin makita ang kontrobersyal’ng Instik nga si Tony Young kuyog sila kanhi PRO 10 regional directors retired Gen Benjamin Acorda Jr;Brig Gen Lawrence Coop ingon man sila kanhi COCPO City Director Col. Aaron Mandia ug Anti-Cyber Crime Unit 10 commander Col. Lemuel Gonda.
Giangkon ni Yang pinaagi sa iyang interpreter nga si Carolyn Batay nga kaila niya ang maong mga pulis sanglit dugay nang kining nagpuyo sa dakbayan.
Kini ang hinungdan nga sa sunod pagdungog sa POGO controversy sa senado,ipatawag sila sa aron makahatag katin-awan kon unsay ilang kalambigitan kang Yang nga giakusahan sa daghang kalihukang ilegal dinhi sa nasud.
Si Yang pinangita usab sa China tungod sa mga atraso sa scam financing.
Samtang giangkon ni Yang nga siya usa ka kaliwat Instik ug naghimugso sa China.
Apan siya miingon nga nagpa-rehistro kini sa iyang English name aron makahimo’g daghang negosyo dinhi sa nasud.
Gibutyag ni Yang pinaagi sa iyang interpreter nga si Batay nga dekada 90 pa kini miabot sa Pilipinas ug nagpa-late registration sa pangalan nga Antonio Mahestrado Lim sa Misamis Orienal aron legal ang pagpahigayon sa mga negosyo.
Apan gikasuko nila ni Senador Joel Villanueva ug Senador Risa Hontiveros ang grabeng pagpangilad ni Yang sa gobierno sa Pilipinas.
Si Yang ang nanag-iya sa Oro One Corporation nga kanhi operator sa POGO nga nagsira sa Alwana Business Park sa Brgy Cugman ug dakong steel plant sulod sa Phividec sa Tagoloan,Misamis Oriental.
