CAGAYAN DE ORO CITY – Gitun-an sa kompanyang Metro Pacific Water ug Cagayan de Oro Bulk Water Incorporated o MetroPac-COBI ang pagduso’g kasong kriminal nunot sa ilang gipamugos nga pugsanong pagsulod sa mga sundalo’g pulis sa Rio Verde Water Consortium sa Brgy Pualas,Baungon,Bukidnon.
Kini epekto sa plano unta sa kompanya nga temporaryong ihunong ang pag-suplay sa tubig sa COWD kay pabiling nagmagahi pagbayad sa obligasyong-pinansyal nga nalatid sa kontrata.
Namahayag si MetroPac-COBI senior legal counsel Atty. Roberto Rodrigo nga gitun-an na sa ilang legal team ang sunod nga himoong lakang alang niini.
Namugos si Rodrigo nga bakak ang nadawatan nga impormasyon ni City Mayor Rolando ‘Klarex’ Uy gikan sa kapolisan nga wala sudla ang ilang pasilidad kay nagkupot sila sa pipila ka hulagway ug videos mismo sa hitabo sa miaging kadlawon sa Mayo 1.
Una usab niini, namugos ang tinudlo nga board of director ni Uy sa COWD nga si Dr. Gerry Caño nga mas angayan mohimo’g aksyon ang Rio Verde kay sila ang tag-iya sa planta ug dili ang MetroPac-COBI nga igo lang nag-negosyo’g tubig sa syudad.
Namugos ang COWD BOD member nga walay katungod ang grupo ni Rodrigo sa pagkuwestiyon sa gihimong lakang sa dakbayan.
Dumduman nga paghuman sa maong hitabo,gidangop kini sa Rio Verde plant manager nga si Engr Ulyses Bracero sa barangay aron ipatala.
