CAGAYAN DE ORO CITY – Gi-depensa sa Police Regional Office 10 kon nganong pabiling wala pa’y natudlo nga mga suspek nga responsable pagdunggab-patay sa kolehiyalang sacristan sa simbahan diha sa Zone 4,Sitio Dinogon,Brgy Santa Ana,Tagoloan,Misamis Oriental.
Kini human unang gidemanda sa pamilya sa biktima nga si Lady Grace Galo ang dinalian nga hustisya sa iyang kamatayon sa miaging semana.
Miingon si PRO 10 Director Brig Gen Jaysen De Guzman nga wala hunungi apan gipatutukan niya’g maayu ang imbestigasyon aron madakpan ang tinud-anay nga mga criminal sa hitabo.
Siya miingon nga tahas niya kang Misamis Oriental Police Provincial Office Director Col. Wilbur Salaguste nga kanunay’ng subayon ang mga imbestigador nga natahasan sa pagsulbad sa maong kremin.
Hisayrang tungod sa grabeng kasuko sa katawhan nga nasayod sa hitabo,nakatala na sa 10 ka persons of interest ang naimbitar sa Tagoloan Police Station aron makakuha sa ensaktong impormasyon nga magamit sa pagdason sa kaso batok utok sa kremin.
