CAGAYAN DE ORO CITY – Gitahas ni Police Regional Office 10 Director Brig Gen Jaysen De Guzman sa iyang tanang lower unit commanders nga ipaubos sa monitoring ang Chinese nationals nga makit-an nga mosulod dinhi sa rehiyon.
Kini sa pagsiguro nga masuta sa kapolisan ang nag-unang mga katuyuan sa mga Intsik aron dili na masubli nga malutsan nga dunay pangtukuron nga POGO facilities sama sa gipanag-iya ni Antonio Mahestrado Lim alyas Tony Yang nga sirado na diha sa Brgy Cugman.
Gimando usab sa heneral nga mohimo’g inspeksyon sa tanang mga bodega ug ubang lugar nga gidudahan nga gipahimutangan sa POGO facilities.
Gihimo sa opisyal ang pahayag nunot sa taho sa Presidential Anti-Organized Crime Commission o PAOCC nga gibahin-bahin sa mga sindikato ang ilang mga sakop ug migamit na lang sa apartment o residential houses.
