CAGAYAN DE ORO CITY – Naka-full alert status ang kapolisan ug militar sa paghatag seguridad sa mga kandidato sa brgy ug kabatan-unan nga apil sa umaabot piliay sa Oktobre 30 ning tuiga.Kini alayon sa pagsugod na sa mga kandidato sa ilang kampanya sulod ning adlaw hangtod sa petsa 28 karong bulana.
Miingon si Police Regional Office 10 spokesperson Police Maj. Joann Navarro nga sundon lang sa mga kandidato ang gilatag nga gabayan sa Commission on Elections aron walay mahitabo nga pagkabalda sa kahusay’g kalinaw sa 2-mil 022 ka brgy nga mohimo’g pagpili sa bag-ong mga opisyal sa katapusang semana sa bulan ning tuiga.
Samtang makatutok ang hugot nga atensyon sa kapolisan ug militar sa 188 ka brgy nga gitratar sa Comelec 10 nga areas of concern nunot sa pagsugod sa kampanya sa mga kandidato sa piliay sa brgy karong adlawa.
Miingon si Navarro nga hinoon,dili makita ang maong mga brgy sa mga syudad sa Iligan ug Cagayan de Oro apan pipila ka probinsiya sa rehiyon.
Siya miingon nga sa maong ihap,may 101 ka brgy niini ang ubos sa yelllow category samtang laing 86 ang gipahimutang usab sa color orange.
Apan siya miingon nga may naka-red caterogy usab nga makita sa lungsod sa Nunungan,Lanao del Norte diin dunay labing seryoso nga bantayunon sa seguridad mismo sa piliay.
Sa pikas bahin,epektibo na ang kaugalingong task force sa 4ID,Philippine Army isip kaabag sa kapolisan sa paghatag seguridad sa piliay sa brgy sa kapatusang semana sa Oktubre ning tuiga.
Kini ang pasalig ni 4ID spokesperson Maj. Francisco Garello Jr isip deputy govt agency sa Comelec alang sa piliay ning tuiga.
Miingon si Garello nga mohimo sila’g mga focused operations sa mga lugar diin anaa ang taas nga bahad ug presensiya sa mga kaaway sa gobierno sama sa CPP-NPA ug ubang armadong mga pundok.
Sa pikas bahin,gipadumduman ni Comelec 10 regional director Atty Reynato Magbutay ang local govt unit officials nga likayan ang paggamit sa ilang mga impluwensiya aron ihatag sa mga kandidato sa brgy.
Miingon si Magbutay nga unta mobati sa delikadeza ang maong mga mayores ug gobernadores kay dili kini alang kanila nga eleksyon apan sa lebel sa brgy.
Nagpasidaan kini nga dili mangahas paghimo niini aron dili sila maapil sa mag-atubang sa mga kaso pag-abot sa higayon nga makakuha’g basehan ang taga-Comelec.
Dugtong usab niini,gi-alerto mismo ni Comelec chairman George Garcia ang publiko batok sa giingong ballot for sale scheme.
Kini human dunay natala nga kaso niini sa Basilan nga hayan mahitabo usab sa ubang bahin sa nasud.
Siya miingon nga gibantaya’g maayo sa ahensiya nga dili mabastos ang mga balota nga gamiton sa piliay.
Dugang ni Garcia nga dili lang magpasapon kadtong mohimo’g pagpamalit sa mga boto kay seryoso sila sa paggukod kanila aron makasuhan ug mabilanggo kon may igong mga basehan.
