CAGAYAN DE ORO CITY – Gimanduan ni DILG Sec Eduardo Año nga ipakuha sa PNP ang mga residente nga positibo sa coronavirus disease nga naka-house quarantine lamang.
Kini sa tuyo nga kapugngan ang ihap sa mga dugang tawo nga magpositibo sa bayrus sa nasud.
Miingon si Año nga magpabilin lamang ang maong mga pasyente kon magbaton sila sa tulo ka health requirements nga magsumpo sa local transmission sulod sa mga pinuy-anan niini.
Samtang dili na bag-o sa Police Regional Office 10 ang gusto ipatrabaho sa DILG nga paghaw-as sa mga residente nga natakdan sa COVID-19 dinhi sa rehiyon.
Kini human unang gitahasan sa ahensya ang mga pulis nga mohatag seguridad sa health workers aron makuha ang naka-house quarantine nga mga pasyente.
Miingon si PRO 10 Director Brig Gen Rolando Anduyan nga dili angay kahadlukan ang pagkuyog sa ilang mga pulis kay gitumong kini pagseguro nga madala sa quarantine facility ang mga pasyente nga positibo sa bayrus.
