CAGAYAN DE ORO CITY – Gisaway ni kanhi City Mayor Oscar Moreno ang palisya ni City Mayor Rolando ‘Klarex’ Uy nga obligahon pa nga ma-rehistro ang nag-18 anyos nga estudyante o ginikanan aron makaapil sa city scholarship program sa dakbayan.
Namahayag ang kanhi mayor nga sulod sa siyam ka tuig niya nga pagdumala sa syudad,wala niya sukad lisud-lisura ang kabataan ug ginikanan aron lang makapahimulos sa maong programa sa edukasyon.
Siya miingon nga dili serbisyo apan pag-dominar ug pagkontrol sa katawhan ang gihimo ni Uy gamit ang resources sa gobierno alang sa iyang personal nga katuyuan.
Samtang gidawat na sa dugay’ng panahon ni Uy ang ubos nga pagtan-aw ug pagbiay-biay ni Moreno kaniya isip natahasan idumala ang dakbayan.
Miingon ang mayor nga dili siya ang klase sa tawo nga hilig mopatoo sa kaugalingon nga dunay lantid nga salabutan aron mahimong humot atubangan sa katawhan.
Namahayag si Mayor Klarex nga kalipay na niya nga ikaatubang sa personal ang daghang tawo kada-semana sa city hall ug ang pagkab-ot sa taas nga kadungganan alang sa syudad nga pakyas makuha sa siyam ka tuig ni Moreno.
