Mukabat sa 397 drones ug 18 ka missile ang gipalupad sa Russia padulong sa Keiv City, Ukraine, kagabie.
Ang insidente nagresulta sa pagkaguba sa daghang residential buildings, apan duha pa ka tawo ang kumpirmadong patay.
Lakip sa nadiskobrehan sa mga otoridad ang Shahed drones nga ginama sa Iran.
Ang mga debris sa drone nahulog sa 23 ka lokasyon sa syudad, ug misampot sa 22 ka tawong samaran.
Usa sa mga namatay mao ang 22-anyos nga policewoman, ug ang usa ka 68-anyos nga babaye.
Tungod sa kalit nga pag-atake, daghang mga residente ang nanagan paingon sa subway stations aron magpasilong.
Matud sa Ukrainian Air Force, napukan nila ang 164 ka drone ug 14 ka missile gamit ang air defenses ug electronic warfare.
Ang Pangulo sa Ukraine nga si Volodymyr Zelenskyy mitawag sa maong insidente isip eskalasyon sa terorismo ug nanawagan sa dugang suporta sa depensa gikan sa mga kaalyado sa nasud.
Gituohan nga kini nga pag-atake usa sa pinakadako nga aerial assault sa Kyiv sukad nagsugod ang gubat niadtong 2022, samtang nagpadayon ang tensyon tali sa Russia ug Ukraine.
