CAGAYAN DE ORO CITY – Gusto sa grupong Citizen Watch for Good Governance o CWGG 10 nga mismo si Pres Bongbong Marcos ang molugwa’g direktang mando ehekutibo nga Local Water Utilities Administration o LWUA pinaagi sa interim officials ang modumala sa Cagayan de Oro Water District sa syudad.
Kini aron mahilom na ang regular COWD board of directors ug managers nga nag-kuwestiyon sa legalidad sa gihimo sa LWUA.
Miingon si CWGG 10 convenor Atty. Antonio Soriano nga kon subayon ang presidential decree 198,dili makita ang basehan sa LWUA nga pag-takeover sa COWD kay wala kini obligasyong pinansyal ngadto kanila.
Kini ang rason nga angay dunay opisyal nga komunikasyon si Marcos nga ilugwa kaysa pasagdan ang LWUA pagsulbad sa suliran sa COWD payables ngadto sa MetroPac company ni Manny V.Pangilinan.
Samtang nagkupot sa legal nga basehan ang LWUA officials sa ilang pagtudlong interim officials aron dumalahon ang kasamtangang kahimtang sa COWD sa syudad.
Kini usab ang nakita sa grupong Community Alliance for Water Social Action o CAWSA nunot sa lantugi kon legal o ilegal ang pagsulod sa interim COWD board of directors sa kalihukang panubig sa dakbayan.
Namahayag si CAWSA convenor Atty. Proculo Sarmen ng wala usab kini nagpasabot nga limitado na ang nadehadong regular COWD board of directors pagpangita’g legal remedy kon sa ilang pagtoo dunay abusong nahimo ang LWUA.
Apan miingon si Sarmen nga maglisod na sila pagkuha sa suporta sa publiko sa isyu tungod kay mismo na si Marcos ang nakatutok sa isyu sa panubig sa dakbayan.
