CAGAYAN DE ORO CITY – Giporma sa interim officials sa Cagayan de Oro Water District o COWD ang usa ka komitiba nga maoy tahasan ang pag-rebyo sa disputed payable claims sa Metro Pacific Waters ug Cagayan de Oro Bulk Water Incorporated o MetroPac-COBI.
Kini aron matutalimbang sa COWD interim officials kon tinud-anay nga dunay obligasyon ang water district nga angay bayran ngadto sa COBI nga sobra 400 milyones pesos.
Namahayag si interim COWD General Manager Fermin Jarales nga paminawon nila ang panig sa tanang panig aron maka-abante na sila sa laing tahas nga gisugo sa Local Water Utilities Administration nga nag-agad usab sa kamanduan ni Pres Bongbong Marcos.
Siya miingon nga kon dili mahilot sa ilang lebel ang maong isyu,sundon na nila ang nalatid sa kontrata nga dunay panagsabot sa arbitration court nga gisugo nga didto himoon sa Singapore.
Hisayrang nakahan-ay na sa short,immmediate ug long term solutions ang interim officials sa pagpabangon sa COWD nga nag-atubang sa daghang suliran sukad pa sa milabay’ng mga katuigan.
