Dako ang mulo karon sa mga mamumuo, ilabina sa mga delivery riders, tungod sa giingong kakuwang ug kalangay sa ayuda gikan sa gobyerno taliwala sa nasinati nga krisis. Gibutyag ni Josua Mata, ang representante sa Sentro ng mga Nagkakaisa at Progresibong Manggagawa (SENTRO), nga bisan pa man sa mga gisaad nga suporta, daghan gihapon ang wala makadawat niini bisan lapas na ang usa ka bulan.
Tungod niini, napugos ang mga drayber ug riders sa pagtrabaho og mas taas nga oras aron lamang makasugakod. Gawas sa problema sa ayuda, gihulagway usab nga kulang ang plano sa kagamhanan alang sa kinatibuk-ang sektor sa mga trabahante nga grabeng apektado sa sige’g saka sa presyo sa palaliton ug pletehan.
Sa kasamtangan, mas migrabe pa ang kalisod sa transportasyon sa Metro Manila human daghang mga drayber ang mipili nga dili una mobiyahe tungod kay wala na silay makuha nga ginansya sa taas nga presyo sa gasolina. Tungod sa maong sitwasyon, nanawagan ang sektor sa mga mamumuo og dinalian ug konkretong lakang gikan sa gobyerno aron mahatagan og tinuoray nga proteksyon ang mga ordinaryong trabahante nga maoy labing naigo sa krisis sa ekonomiya. (jane mae abulag)
