CAGAYAN DE ORO CITY – Gitugtan sa city govt pinaagi sa special session sa konseho ang kompanyang Rio Verde nga direktang makasuplay tubig sa katawhan sulod sa 15 ka tuig.
Kini maoy nauyunan sa konseho isip pagpangandam sa city hall dili na mo-suplay sa panubig ang kompanyang Metro Pacific Waters nga nagpalit lang sa Rio Verde aron ihatag sa Cagayan de Oro Water Distrtict o COWD.
Sa gihimong botasyon nga gipanguluhan ni City Vice Mayor Jocelyn ‘Bebot’ Rodriguez,15 ang mipabor sa resolution interposing of no objection samtang duha ka sakop sa minoriya ang nag-abstaine samtang dakong supak si Kag. Imee Moreno.
Sa maong resolusyon,gitugtan ang Rio Verde mobaligya sa 15 pesos per cubic meter sa unang lima ka tuig samtang 16 pesos sa mosunod nga katuigan.
Samtang namugos si Moreno nga dili una angay sudlan sa city govt pinaagi sa paghatag pagtugot sa Rio Verde nga direktang mosuplay sa panubig.
Kini bisan kon gibaharan sa kompanyang Metro Pacific Waters pinaagi sa Cagayan de Oro Bulk Waters o COBI nga putla’g suplay ang COWD kon dili mabayran ang sobra 400 milyones pesos nga utang niini.
Namahayag ang batan-ong Moreno nga dunay kasamtangang kontrata ang COWD ug COBI rason nga angay tahuron kini ug ipahuman ayha sudlan sa laing water providers.
Ang tubig nga gisuplay sa COBI sa COWD ang gikan ra gihapon sa Rio Verde.
Sa pikas bahin,dili pa angayang mosulod kay hayan makasupak sa balaod ilabina nga aktibo pa ang kontrata tali sa COWD ug COBI sa panubig sa syudad.
Kini ang gibarugan ni opposition leader Kag. Ian Achas samtang gituki ang resolusyon nga nagtugot sa kompanyang Rio Verde nga direkta nang magsuplay tubig sa dakbayan.
Apan namahayag si Achas nga dako kining uyon nga angay sulbaron ang isyu sa panubig sa dakbayan.Nunot niini,dili angay magpasagad nga basta-basta e-kanselar ang kontrata sa COWD-COBI.Kini ang pasidaan ni kanhi City Vice Mayor Antonio Soriano kabahin sa maong isyu.
Miingon si Soriano nga dunay punto ang dakbayan sa paghimo’g aksyon apan dakong kasupakan kon hilabtan ang COWD-COBI contract.
Gipasabot sa kanhi-bise mayor nga dili apil sa pirma sa kontra ang city govt rason nga angay sila dili manginlabot niini.
