CAGAYAN DE ORO CITY – Kasamtangang gihatagan sa medikasyon sa Northern Mindanao Medical Center ang samaron nga aktibong sakop sa rebeldeng New People’s Army o NPA nga naluwas sa mga sundalo’g pulis gikan sa engkuwentro sa Sitio Camang,Barangay Tignapoloan ning syudad.
Giila ni Lumbia Police Station commander Major Mike Dioren Cavan ang NPA member nga si Arnel Arcayan,legal ang edad ug nagpuyo sa Little Baguio, San Fernando,Bukidnon.
Saysay ni Cavan nga unang gika-engkuwentro sa 1st Special Forces Batallion sa Philippine Army ang wala matino nga ihap sa mga rebelde diin wala damha nga naigo si Arcayan ug gibiyaan lang sa nanggisibat nila nga mga kaubanan sa miaging semana.
Natultulan lang ang lokasyon sa rebelde dihang mihimo na sa clearing operations ang militar rason nga dunay pagpangayo’g tabang niini sa kapolisan ug Cagayan de Oro City Disaster Risk Reduction and Management Council aron madali ang pagdala sa ospital.
Una nang gidangop sa government forces ang samarong rebelde sa city-run hospital apan tungod sa igo sa ulo ug likod sa dili tino nga kalibreng armas,gibalhin na kini sa NMMC alang sa mas komprenhensibong medikasyon.
Ipaubos sa kostudiya sa 1st Special Forces Batallion si Arcayan sa oras nga malibre na kini sa iyang giatubang nga medikasyon.
