CAGAYAN DE ORO CITY – Gihulat ni adhoc committee chairman Kag James Judith nga ipatawag siya ni City Mayor Rolando ‘Klarex’ Uy kabahin sa findings report sa re-investigation nga ilang gihimo kabahin sa sobra 700 milyones pesos nga special Enhanced Community Quarantine ayuda nga gihatag sa natl govt sa katawhan sa dakbayan sa miaging tuig 2021.
Kini human natugyan sa konsehal ang unod sa report diin may gitudlo nga city hall employees nga giingong manubag tungod sa nadiskobrehan nga pipila ka financial release discrepancies o binuang sa maong higayon.
Siya miingon nga fact finding lamang ang gihimo sa iyang gipanguluhan nga komitiba ug ang mayor na ang bahala kon itago o itug-an niya kini sa katawhang magbubuhis sa syudad.
Samtang gibarugan ni social services committee chairman Konsehala Girlie Balaba nga walay bisan unsa nga natigayong binuang sa pagpanghatag sa special ECQ ayuda sa libuang pamilya nga apektado sa COVID-19 sa dakbayan sa miaging duha ka tuig.
Kini ang reaksyon sa konsehala kabahin sa fact finding result sa komitiba.
Miingon si Balaba nga nahatagan sa clearance sa Commission on Audit ang financial disbursement sa minilyong pondo nga gigamit sa dakbayan,busa nagkahulugan kini nga walay tinunto sa maong cash distributions sa miaging administrasyon.
