CAGAYAN DE ORO CITY – Bukas si City Mayor Rolando ‘Klarex’ Uy nga pasudlo’g balik sa syudad ang serbisyong panubig sa kompanyang Rio Verde Water Consortium isip direktang supplier sa Cagayan de Oro Water District o COWD.
Nahimugso ang pahayag sa mayor nunot sa bahad sa Metro Pacific Waters nga maoy nagdumala sa Cagayan de Oro Bulk Water o COBI nga kutob na lang ning bulana ang ilang pagsuplay-tubig sa syudad kon dili kabayad ang COWD sa halos tunga sa bilyon pesos nga utang.
Namahayag si Uy nga itugyan na niya kini nga aspeto sa board of directors sa COWD ang pagsusi sa kapas sa Rio Verde ayha mohimo’g pinal nga hukom.
Una niini,gipasalig ni Rio Verde President Engr. Joeffrey Hapitan kang Kag. Ian Mark Nacaya nga andam nila tubagon ang panubig sa syudad kon mawala ang COBI.
Apan gusto usab masiguro sa Rio Verde nga dili maalanganin ang ilang negosyo kon molampos ang city hall pagsipa sa COBI ning syudad.
Samtang dili makasulbad sa nagkadako nga problema sa COWD ang konohay gitukod nga task force ni Uy ilabina sa bayronon nga halos tunga-bilyones pesos na ngadto sa COBI.
Kini ang nakita ni kanhi City Mayor Oscar Moreno sa daw pag-rescue sa grupo ni Mayor Klarex sa giatubang nga dakong utang water district sa syudad.
Miingon si Moreno labing maayo nga tinud-anay nga sulbad ang pangitaon sa city hall ug dili ang paggamit sa kabalaka sa katawhan apan pahimudsan sa ilang politikanhong interes sa umaabot piliay sa dakbayan.
