CAGAYAN DE ORO CITY – Suportahan ni City Mayor Klarex Uy ang kagustuhan sa konseho ubos ni City Vice Mayor Bebot Rodriguez nga kuha-o’g balik ang pagdumala sa kontrobersyal nga Ms Cagayan de Oro isip kabahin sa highlights sa kapistahan ni Sr San Agustin sa matag-Agosto sa dakbayan.
Kini human dad-a ni City Councilor Edgar Cabanlas sa ilang regular session ang pipila ka kapalpakan sa maong pageant diin mikuha sa serbisyo mga ‘medyo yabag’ nga harana singers ngadto sa mga kandidata atol sa koronasyon niini.
Miingon ang mayor nga kon mabalik na ang pagdumala niini sa dakbayan,iyang padak-an ang grabe ka gamay nga cash prizes sa winning ug non-winning candidates.
Dili tiaw ang pagsaway nga nadawatan sa dakbayan gikan sa katawhan gumikan mga yabag nga singers sa maong kalihukan.
Samtang dili pagpakaulaw ug pagbiay-biay kon nganong gituki sa konseho ang pipila ka palpak sa bag-uhay nga mga aktibidad sa Higalaay Festival dinhi sa syudad.
Kini ang pagtin-aw ni Cabanlas nunot sa pipila ka komento kon nganong gidaginot sa konseho ang isyu sa ‘medyo yabag’ singers sa 2022 Ms Cagayan de Oro.
Miingon ang konsehal nga nabutang sa dako nga ulawon atubangan sa local ug international social media audience ang dakbayan rason nga kini angayang imbestigaran aron dili utruhon sa organizers.
