Gilusad kaganihang buntag sa Metropolitan Manila Development Authority kon MMDA ang ikaduhang leg sa ilang “Yes to Ayos” campaign didto sa Potrero Elementary School sa Malabon City.
Matod pa ni MMDA General Manager Nicolas Torre III, tumong sa maong lakang nga pukawon pag-usab ang disiplina sa matag usa pinaagi sa gitawag nga “whole-of-community” approach. Gipasiugda sa maong kampanya ang saktong paglabay sa basura ug ang pagtamod sa mga patakaran sa trapiko, sama sa pagtabok sa hustong labanganan ug saktong pagparada sa mga sakyanan.
Kini nga inisyatiba kabahin sa nasudnong kampanya sa disiplina sa gobyerno ubos sa administrasyon ni Presidente Ferdinand Marcos Jr. Nagtoo ang ahensya nga ang tinuod nga kahapsay ug kalimpyo sa komunidad magmalampuson lamang kung magtinabangay ang kagamhanan ug ang mismong katawhan. (jane abulag)
