Miulbo ang usa ka residential fire sa Jr. Borja Extension, Macajalar, Camaman-an ning syudad pasado alas 1:30 sa hapon kagahapong adlawa.
Sumala ni Fire Senior Inspector Louis Roy Solamo, mokabat sa ₱600,000 ang estimated nga kadaot sa maong sunog ug naka-ugdaw sa 19 ka kabalayan.
Nagsugod ang sunog sa duha ka andana nga panimalay ni Zenayda Pagarina Villamor, nga wala na magpuyo sa maong balay.
Ang iyang anak ug mga apo lamang ang anaa sa sulod sa panimalay sa dihang nahitabo ang insidente.Gituohang ang tinubdan sa sunog mao ang pagdula sa mga apo og posporo, nga posibleng nahimong hinungdan sa kalayo.
Giingon pa nga dili kini unang higayon nga nadungog nga nagdula og kalayo ang mga bata, apan gibadlong na sila kaniadto.
Hisayrang dali mikatag ang sunog tungod sa kakusog sa hangin ug kainit sa panahon, lakip pa nga gama lamang sa light materials ang mga kabalayan sa maong lugar.
Padayon karon ang imbestigasyon sa Bureau of Fire Protection (BFP) kalabot sa insidente.
